Thursday, March 29, 2007

دقيقة حداد

ماليش نفس اسمع اغاني من يوم "الاستهبال" على الدستور

نبقى نسمع بعدين ...لما ننسى ...كالعادة...وجع القفا

واه يا قفا

Wednesday, March 21, 2007

صباح الخير يا مولاتي

مفيش اجمل من كلمات صلاح جاهين و الحان كمال الطويل و اداء سعاد حسني هدية لكل ام في الدنيا...اسمعوها


يا ماما يا أما يا اماتي
سلاماتي احتراماتي قبلاتي

صباح الخير يا مولاتي
يا ماما يا أما يا اماتي
ابوس الايد و قلبي سعيد
يا أول حب في حياتي
يا أمي

علشانك انهاردة الدنيا كارت معايدة
ملا الربيع أركانها بمليون الف وردة
والكون بقى جوة بيتك و انا قبل الكل جيتك
يا اللي انتبهت لقيتك انا وانتي حاجة واحدة
تحبيني وانا أحبك و أعيش بالقرب من قلبك
عيوني معجبة بيكي و روحي كلها تجاوبك
وأغمض و أفتح أقولك
صباح الخير يا مولاتي

بغني للأمومة و لليد الخدومة
و أقول الله يا أمي عالدفئ و النعومة
يا ست يا فدائية يللي قضيتها هي
تجعل حياتي هنية ولو تبات مهمومة
تعبتي كتير عشان خاطري
عشان أمشي عشان أجري
و مهما جريت بعيد خالص
أديني جيت قوام بدري
يا ماما يايما يا أماتي
صباح الخير يا مولاتي

شعر صلاح جاهين
لحن كمال الطويل
غناء سعاد حسني



Tuesday, March 20, 2007

شفت منام

ليلى مراد في رأيي صوت لا يمكن تقليده او تكراره ...زي ام كلثوم كده ...بس الاغنية دي انا مش بحبها عشان ليلى مراد وبس ...اللي فعلا بيشدني فيها الفكرة في كلام حسين السيد و لحن احمد صدقي...فكرة ان حد يكتب عن حلم و مش لاقي تفسير له لانه عبارة عن صور متداخلة زي لوحة سريالي كده فكرة جريئة جدا من شاعر حريف اوي زي حسين السيد...لحن احمد صدقي منتهى الروعة ...والنبي تتفرجوا على المقدمة و خاتمة الاغنية ...على رأي شويكار ...شئ لا يصدكه عكل...اسمعوها

شفت منام و احترت انا فيه
دلوقتي هحكيلكوا عليه
كورال
خير انشالله شفتي ايه
يجعله خير اللي حلمتيه
والنبي قولي شفتي ايه
ليلى
دلوقتي هحكيلكوا عليه
يا مفسرين الاحلام عينيا مش هتنام
دلوني بس اوام يا مفسرين الاحلام
كورال
قوليلنا ايه المنام
ليلى
شفت الميه جايه عليا
جريت معرفش جريت على فين
لقيت حواليا برضوا الميه
بتجري ورايا على الصفين
كورال
بتجري وراكي على الصفين؟
ليلى
على الصفين
كورال
هى و بعدين؟
ليلى
قفلت عينيا و بعد شوية
فتحت ايديا لقيت قلبين
قلب بيحكي و قلب بيشكي
وانا محتارة بين الاتنين
كورال
بقى محتارة بين الاتنين؟
ليلى
بين الاتنين
كورال
هى و بعدين؟
ليلى
قلت سيبوني قاموا شالوني
والقلبين صبحوا جناحين
طرت معاهم وانا فاكراهم
عصافير من اللي تشوفها العين
كورال
والعصافير كان لونهم ايه؟
ايوة صحيح كان لونهم ايه؟
ليلى
ريشهم نور
نور كان احمر
الاتنين طاروا على الخدين
ولقيت روحي ماسكة في روحي
وانا بتمرجح بين نارين
يا مفسرين الاحلام عينيا مش هتنام
دلوني بس اوام يا مفسرين الاحلام

شعر حسين السيد
لحن احمد صدقي
غناء ليلى مراد

نزل الاغنية



Friday, March 16, 2007

سحب رمشه و رد الباب

أنا بعتبر الاغنية دي من الاغاني الكاملة ...زي الجريمة الكاملة كدة ...متقدرش تمسك حاجة على التلاتة العباقرة اللي عملوها ...الملحن عبد العظيم عبد الحق ..ودا للي مايعرفوش هو نفسه الممثل عبد العظيم عبد الحق ...فاكرين الراجل العجوز اللي كان بيبستف الناس في الاوتوبيس في فيلم الارهاب و الكباب؟؟ اهو هو ده عم عبعظيم...ملحن تقيل قوي ...بس مين يسمع....المغني محمد قنديل ...صوت محمد قنديل عامل زي الأب كده ...قوي بس حنين...يجتاحك بس بمنتهى الرقة...اما الشاعر عبد الفتاح مصطفى كاتب شوية صور يا جدعان...ايه الروقان و الانسيابية دي؟؟ الكلام ده طلع ازاي كده مع بعضه بالحلاوة دي؟؟ بجد أغنية فرجة...اسمعوها


سحب رمشه و رد الباب كحيل الاهداب
نسيت اعمل لقلبي حجاب و قلبي داب

رموشه تميل على خده
جناح رفرف على ورده
ولو طلب القمر وده
أمل كداب
نسيت اعمل لقلبي حجاب و قلبي داب
سحب رمشه و رد الباب

نسيم العصر عالقصة
بيحكي في الهوى قصة
وبين البصة و البصة
تدوب أحباب
نسيت اعمل لقلبي حجاب و قلبي داب
سحب رمشه و رد الباب

كحيل و الكحل من بابل
وامتى عيونا تتقابل
يا ريت نظرة وانا قابل
ولو بعتاب
نسيت اعمل لقلبي حجاب و قلبي داب
سحب رمشه و رد الباب

غزال انفاسه تتنسم
عبير
و الخطوة تتقسم
نغم
و شفايفه تتبسم
ولا العناب
نسيت اعمل لقلبي حجاب وقلبي داب
سحب رمشه و رد الباب

شعر عبد الفتاح مصطفي
الحان عبد العظيم عبد الحق
غناء محمد قنديل

Tuesday, March 13, 2007

يا اللي انت ناسيني

الاغنية دي بحب المقدمة الموسيقية بتاعتها اوي...محمد فوزي كان رايق اوي...نازك كمان صوتها فخم كدة ...صوت لابس سواريه...من اكتر الدويتوهات اللي بعشقها...اسمعوها


محمد فوزي
قلبي اللي انت ناسيه ...اسأل مرة عليه
يا اللي انت ناسيني...بعدك على عيني
الليل سهرني و سهرته...والشوق حيرني و حيرته
وادي اخرة قلبي اللي طاوعته
الدنيا في بعادك أزهارها دبلانة
والبدر انواره مع قلبي حيرانة
انا كنت فين و الحب دا فين
يا اللي انت ناسيني ...بعدك على عيني
نازك
يا اللي بتشكي من الهوي هون عليك
الدنيا مليانة هنا ملك لأيديك
انسى أساك و نار هواك
الدنيا تحلى و تروق معاك
واعطف عالقلب اللي يحبك
يفرح قلبك وافرح جنبك
يا اللي انت ناسيني ...بعدك على عيني
محمد فوزي
اهو جاني حبيبي اهو جاني
ورجعلي الفرح من تاني
غني يا قلبي غنوة حبي
غنيها و قولها من تاني
يا منور في عينيا الدنيا
الدنيا في قربك حاجة تانية
الورد بيضحك و يغني و يهني جمالك يا حبيبي
والنسمة تمر و تسألني عن سر جمالك يا حبيبي
غني يا قلبي غنوة حبي ...غنيها و قولها من تاني
شعر محمد حلاوة
الحان محمد فوزي
غناء محمد فوزي و نازك

Saturday, March 10, 2007

اول لقانا كان هنا

اكتر حاجة عجباني في الاغنية دي هي لحن منير مراد و طريقة تقديمه ...الاغنية من فيلم و المفروض ان شادية بتغني و هي سايقة حنطور ...ذكاء منير مراد كملحن واضح جدا في استخدامه ايقاع خطوة الحصان بتاع الحنطور كمقدمة و لازمة ايقاعية ...ودا يبين قد ايه الراجل بيدرس الاغنية قبل ما يضع لحنها...كلمات فتحي قورة سهل ممتنع كالعادة ...و شادية عسلاية برضو كالعادة لاحظوها و هي بتقول "ايام ما كنا عصفورين" منتهى الذكاء انها ترقق صوتها زي الاطفال عشان الكلمة معناها يحتويك مش يعدي كدا بالساهل على ودنك...اسمعوها


أول لقانا كان هنا...وكان هوانا و حبنا
فات اللي فات ...و الذكريات
لسة هنا و هنا وهنا و كمان هنا


القلب ايه حيصبره...وحبيبي ايه حيفكره
و فين يا دنيا الحب فين
واجيب زماني معاه منين
ايام ما كنا عصفورين وانت علينا حنينه


قبل الفراق كنا سوا اتنين وتالتنا الهوا
يا نسمة روحي و كلميه
على اللي عايشة لوحدي فيه
هاتيه معاكي و فكريه بأحلى أيام عمرنا


البعد ليه حنطوله دا العمر لسه في أوله
تعالى نفرح من جديد
ونرجع الماضي البعيد
يا اللي معاك أملي الوحيد
دا احنا أتخلقنا لبعضنا
فات اللي فات ...والذكريات
لسه هنا وهنا وهنا وكمان هنا


كلمات فتحي قورة
لحن منير مراد
غناء شادية

Thursday, March 8, 2007

في وسط الطريق

الاغنية دي من اكتر الاغاني اللي بحبها لنجاة ...بليغ حمدي و محمد حمزة خلطة عجيبة ...كل واحد فيهم لوحده مبدع ...لكن سوا بحس اللحن بيطبطب على الكلام ...بحس ان لهم لغة خاصة هم الاتنين بس اللي بيتكلموها...معشقين في بعض كده بشكل جميل...و نجاة في الاغنية اخر انسجام ...المقطع التاني من الاغنية بيبهدلني...اسمعوها



و في وسط الطريق و وقفنا و سلمنا وودعنا يا قلبي
و رجعنا الطريق وحدينا و دموعنا في عينينا يا قلبي
ودعنا الحبايب و فارقنا الحبايب ووصلنا النهاية
من قبل النهاية يا عيني ...يا عيني علينا يا قلبي

غالي غالي غالي ...والجرح من الغالي بجراح العمر
لا الصبر ينفع فيه ولا الزمن يداويه ولا الليالي
غالي غالي غالي ....وحكم الليالي ندوق المر
من غير ما نسأل ليه ولا عملنا ايه ...حكم الليالي

و رجعنا الطريق وحدينا من غير كلمة وداع
كل واحد فينا حس ان امله الحلو ضاع
ودعنا الحبايب و فارقنا الحبايب ووصلنا النهاية
من قبل النهاية يا عيني ...يا عيني علينا يا قلبي

لحظة ...دقيقة...ثانية...ثواني
كلمة...طب كلمة...اسمعها علشاني
لحظة واحدة كان يجرى ايه؟
دقيقة واحدة كان يجرى ايه؟
ثانية واحدة كان يجرى ايه؟
لو الزمن أخر فراقنا دقيقة واحدة كان يجرى ايه؟
لو القدر كتب نهاية حب حلوة كان يجرى ايه؟
كان يجرى و يجرى و يجرى ...كان يجرى حاجات كتيرة
كان يجرى و يجرى و يجرى ...كان قلبي ارتاح من الحيرة
ولا ضاعوا الحبايب و فارقنا الحبايب ووصلنا النهاية
من قبل النهاية يا عيني...يا عيني علينا يا قلبي

كلمات محمد حمزة
الحان بليغ حمدي
غناء نجاة الصغيرة

Wednesday, March 7, 2007

همسة حائرة


لحن و غناء محمد عبد الوهاب